تێبینى : ئەم بابەتەم پێش چەند ساڵى پێش نوسیوەو بڵاوم کردۆتەوە ،،،بەڵام خۆش بەختانە ڕێکەوتى ٢٠١٨/٣/١٧ لەگۆڕەپانى پاسەکانى توى مەلیک بەخزمەتى هونەرمەند عومەر ڕەزا گەیشتم و ئەو وێنەیەم لەگەڵدا گرت و بەبۆنەى ئەو وێنەیەوە بابەتەکە تایبەتە بەژیانى هونەرى ئەو هونەرمەندە و پێم خۆشبوو جارێکى دى بڵاوى بکەمەوە …..بەئومێدى ڕەزامەندى ئێوەى ئازیز.
ئەگەر بگەڕێینەوە بۆ ناوەڕاستی ساڵەكانی سەدەی پێشووی شاری سلێمانی ، ئاوڕێك لەبواری هونەری گۆرانی و میوزیكی ئەو شارە بدەینەوە ، دەبینین كۆمەڵێك كەسایەتی بەهرەمەند و دەنگخۆش و هونەرمەند و ژەنیارو ئاوازدانەر لەشاری سلێمانی و دەوروبەری سەریان هەڵداوە ، بەهەوڵ كۆشش و تەقەلایان بوونەتە بەشێكی گرینگ لەمێژووی سلێمانی و كوردستان بەگشتی.
شاری سلێمانی لەسەرەتای سەدەی پێشووەوە خاوەنی تیپی موزیكا بووە ، لەگەڵ ڕەوتی گەشەكردنی سلێمانی لەهەموو بوارەكاندا ، بواری هونەری میوزیك و گۆرانی لە پێشكەوتنی سلێمانیدا ڕۆڵی بەرچاو و كاریگەرییان هەبووە.
هونەرمەندانی دەنگخۆش و میوزیكژەنانی شاری سلێمانی هەریەكەیان بەهونەرەكەیان مێژوویەكیان تۆماركردووە و بەردی بناغەی پێشكەوتنی ئەوشارەیان پتەوتر كردووە ، ئەوەی جێگەی خۆش حاڵی و سەرفرازییە هونەری ئەو هونەرمەندانە بەگشتی لەشاری سلێمانیدا قەتیس نەماون و بەڵكو هونەرەكەیان سنووری بەزاندووەو بەتەواوی كوردستاندا بڵاوبوونەتەوە.
لەبواری هونەرمەندانی ژەنیاردا باسی لێوەبكەین خاوەنی ئەم كەڵە هونەرمەندانەیە كەبەدەست و پەنجە زێڕینەكانیان خزمەتێكی گەروەیان بە هونەری نەتەوەكەمان كردووە و بۆ هەمیشە دەبێت شانازیان پێوەبكەین ،كە نموونەكانیان زۆرن وەك :
( یولیەم یوحەننا ، قادر دیلان ، شەوكەت ڕەشید ، حاتەم سەعید ، نەجاتی عەبدە ، ئەنوەر قەرەداخی ، خالید سەركار، نامدار قەرەداخی ، سەلاح ڕەووف ،عەلی ڕەزا ، حەمەسەعید عەبدوڵا ،…….تاد)
هەروەها لەبواری هونەری دەنگخۆشی و گۆرانیبێژیشدا بێگومان شاری سلێمانی هەژار نیە بەڵكو چەندین گۆرانیبێژ و دەنگخۆشی تێدا هەڵكەوتووە ، و گەنجینەیەكی پڕبەهای هونەرییان لەپاش خۆیان جێهێشتووە ، نموونەی ئەو هونەرمەندانە وەك (ئەحەی ناسر ،ڕەشۆڵ، حەمە صاڵح دیلان ،ڕەفیق چالاك ، مەحموی تۆفیق شلك ، قادری حاجی حسێن ، شەماڵ صائیب، ئەحمەد شەماڵ و عومەر ڕەزا ………تاد )
لەگەڵ هەوڵ و تێكۆشانە هونەرییانەی هونەرمەندانی ئەو شارە نابێت ڕۆڵی ئیستگەی كوردی بەغدا فەرامۆش بكەین ، كە دەنگی هونەرمەندانی كورد بەگشتی لەڕێگەی ئەو ئیستگەیەوە دەدرا بەگوێی بیسەرانی ئەو ڕادیۆیە.
یەكێك لەو هونەرمەندانەی كەلەڕێگەی ڕادیۆی كوردی بەغداوە گۆرانیەكانی تۆماردەكردو بڵاودەبوونەوە ، بەدەنگێكی خۆش و ناسك گۆرانی دەچڕی و گۆرانیەكانی ببوون بە گۆرانی ڕۆژ.
كاتێك گوێ بیستی گۆرانیەكانی ( هاتم هاتم و پەڵپوبیانوم پێ مەگرە ) دەبیت ڕاستەوخۆ هونەرمەند (عومەر ڕەزا ) لەدەرگای بیرو هۆشمان دەدا ، هونەرەكەی دەمانگێڕێتەوە بۆ ناوەڕاست و دەیەی كۆتایی سەدەی بیست ، دەنگێكی ناسك و خۆش و ئاواز و تێكستی سادە كەبەزوویی ببوونە وێردی سەرزاری كۆمەڵانی خەڵكی كوردستان.
هونەرمەند عومەر ڕەزا هونەرمەندێكی جوان و هەست ناسكی شاری سلێمانی دوای تۆماركردنی ئەو چەند بەرهەمە ، زۆر بەداخەوە ، لەهونەری گۆرانبێژی دووركەوتەوە ، ئەویش بەهۆی هەژاری و نەبوونی هاوكاری و دەستگیرۆیی هونەری ، ئێستاش كەلەژیاندایەوە و باری تەندروستی لەبار نیەوە و پەراوێز خراوە.
بیبلۆگرافیای هونەرمەند عومەر ڕەزا :
عومەر حەمە ڕەزا شەریف ، ناسراو بە عومەر ڕەزا ، لەشاری هەڵمەت و قوربانی لەگەڕەكی چوارباخ لەساڵی (١٩٤٢) لە خێزانێكی كرێكارو زەحەتكێش ونەدار لەدایكبووە.
بەڵام عومەر نەیتوانیوە تەمەنی خۆشی منداڵی لەسلێمانی بەسەر بەرێت ، بەهۆی ئەو بارودخە ناهەمووارەی دوای جەنگی جیهانی دووەم كە نەهامەتی و قات و قڕی كەبەسەر جیهاندا باڵی كێشاو خلنوادەی ئەو هونەرمەندەش كەوتنەبەر شەپۆلی ئەو بەدبەختی و نەبوونیە ، باوكی لەپێناو دابینكردنی نان و ژیان بۆ خۆی و خێزان و منداڵەكانی ،ڕوو دەكاتە شاری هەڵەبجە ، ئەو شارەی بەشاری شاعیران و هونەرمەندان و ڕووناكبیران ناسراوە ، لەوێ درێژە بەژیان دەدەن.
عومەر ڕەزا لە هەڵەبجە دەچێتە قوتابخانە ، لە قوتابخانەی هەڵەبجەی سەرەتایی دەخرێتە بەر خوێندن و فێربوونی ئەلف و بێی كوردی ، بەڵام لەو قوتابخانەیە عومەر ڕەزا بەهرەی دەنگخۆشی تێدا بەدی دەكرێت ئەویش بەهۆی مامۆستای ئەدیب و هونەرمەند ( ع،ع، شەونم).
مامۆستا عەلی شەونم كەسەرپەرشتیاری تیپی سروودی قوتابخانەی هەڵەبجە بووە ، بەهەست و سۆزە هونەرییانەی خۆی دركی بەبەهرەی دەنگ خۆشی عومەر ڕەزا كردووە ،هەوڵی لەگەڵدا داوە و لەتیپی سروودی قوتابخانەی هەڵەبجە بەیانیان عومەر ڕەزا لەگەڵ هاوڕێ قوتابیەكانی بەدەنگێكی خۆش سروودە ڕەسەنە نەتەوەییەكانی گەلەكەمانیان خوێندووە ، وەك ( خۆشم ئەوێ وڵاتەكەم ، ئەی ڕەقیب ، ئەی دلێران ، خوایە وەتەن ئاواكەی ، …..تاد )
ئەو بەردەوامییەی عومەر ڕەزا لەناو تیپی سروودی قوتابخانەی هەڵەبجە زیاتر مامۆستا عەلی شەونمی هانداوە كە گرینگی زیاتری پێبدات ، تا ئەو جێگەی ئەو مامۆستا هونەرمەندە دوو گۆرانی بۆ عومەر ڕەزا ئامادەبكات لەهەڵبەست و ئاوازی مامۆستا (ع،ع،شەونم) خۆی بووە ،داویەتی بە عومەرڕەزا تا بیخوێنێ ، گۆرانیەكانیش بریتی بوون لە ( هاتم هاتم , پەڵپو بیانووم پێ مەگرە ) ئەو گۆرانیانە دەكونە سەر زاری هاوڕێكانی و خەڵكی و جێگەی خۆشی و داخوازی خەڵكی دەبن.
بەمشێوەیە عومەر ڕەزا بەردەوام دەبێت لەخوێندن و ژیان لە شاری هەڵەبجە ، تا ساڵی (١٩٥٧) بەماڵەوە دەگەڕێنەوە شاری سلێمانی و هەڵەبجە بەجێدێڵن ، بەڵام ئەمجارە لەگەڕەكی
( سەرچیمەن) نیشتەجێ دەبن.
ئەو گەڕانەوەیە بۆ عومەر دەبێتە هۆی دەستبەرداربوونی لە خوێندن بەهۆی سەختی ژیان و ناچار لەگەڵ باوكیدا شان دەداتە بەر كرێكاری و دەبێتە كرێكار لە دروستكردنی كارگەی جگەرەی سلێمانی ، بەڵام لەگەڵ ناڕەحەتی ژیان و ئەو ئەركە گرانەی سەرشانی ، بەڵام دەست بەرداری هونەری گۆرانی وتن نابێت و هەمیشە لەخەمی ئەوەدا دەبێت كە گەشەبەهونەری گۆرانی گوتن بدات.
ساڵی ( ١٩٥٨) عومەر ڕەزا ڕوو دەكاتە شاری بەغدا و لەوێ بەڕێكەوت ( خەلیل عەبدوڵا و ئەحمەدی شێخاڵی و هونەرمەند شەماڵ صائیب ) دەبینێ و زۆر خۆش حاڵ دەبێت بە دیتنی ئەو كەسایەتیانە ، دوای باس و خواسی هونەری داوای گۆرانی لێدەكەن و عومەر ڕەزاش گۆرانیان بۆ دەچڕێ ، زۆر سەرسام دەبن بەدەنگی و بڕیاردەدەن لەگەڵ خۆیان بیبەن بۆ ئیستگەی كوردی.
كاتێك دەیبەنە ئیستگە لەوێ وەریدەگرن و ناوی دەنووسن بە (( عومەر ڕەزا ) ) ناوی (حەمە) كەی لێدەكەنەوە.
لەئیستگەی كوردی بەغدا ئەو دوو گۆرانیەی كە مامۆستا ( ع،ع، شەونم) لەشاری هەڵەبجە بۆی ئامادەكردبوو ، لەوێ لەگەڵ تیپی مۆسیقاى ڕادیۆ ، بەمیوزیكەوە دەیانخوێنێ.
هونەرمەند عومەر ڕەزا دەڵێت ( من خۆم هەستم بەو بەهرەی دەنگخۆشیە نەئەكرد كە لەمندا هەیە بەڵام مامۆستای گەورەو پیرۆزم ( ع،ع،شەونم) ئەو بەهرە هونەرییەی لەمندا بەدی كرد ئەو گۆرانیانەی بۆدانام ،بەڵام كاتێك چوومە بەغدا و لەئیستگە ئەو گۆرانیانەم بەمیوزیكەوە خوێند ، تام و چێژێكی زۆری هەبوو ، هەستم بەخۆشی و دونیایەكی گەورە دەكرد و لەخۆشیدا گەشكە ئەیگرتم ))
دوای تۆماركردنی ئەو گۆرانیانەو بڵاوبوونەوەیان لە ڕێگەی ئیستگەی كوردی بەغداوە ، دەبێتە جێگەی خۆش حاڵی خەڵك و زیاتر بووە هۆی ناساندنی عومەر ڕەزا لەنێو خەڵكیداو بەهۆی ئەو ڕادیۆیەوە دەنگی عومەر ڕەزا سنووری بەزاندوو لە ڕۆژهەڵاتی كوردستانیش نێوبانگی دەركرد.
ئەو سەردەمە لەشاری سلێمانی گۆرانیەكانی عومەر ڕەزا ڕۆژ بەڕۆژ لەنێو جەماوەردا دەنگی دەدایەو و خەڵكی پێی ئاشنا دەبوون ، لەهەمانكاتدا تیپی موزیكای مەولەوی بەسەرپەرشتی هونەرمەندی گەورە (قادر دیلان ) كارە هونەرییەكانیان ئەنجام دەدا ، هەروەها هەردوو هونەرمەند لەیەك گەڕەكدا دەبن و هاوسێی یەكتریش دەبن ، هونەرمەند قادر دیلان عومەر ڕەزا دەبات بۆ تیپی موزیكای مەولەوی ، لەوێ بەم هونەرمەندانەی دەناسێنێ وەك ( ولیەم یوحەننا ، نەجاتی عەبدە ( نای ژەن)، حازم حەداد (عود ژەن) ، هادی عەنبەر ( كەمانچە ژەن ) ، حاتەم سەعید ( ئیقاع) ، بەهجەتی سەعاتچی و خاڵە حەمەفەرج و چەند كەسایەتیەكی تر وەك لەتیف حەمدی ) ( یادیان بەخێر)
هەرچەندە هونەر بەگشتی لەو سەردەمەدا جێگەی بایەخ نەبوو لەناو كۆمەڵگادا ، بەڵكو لەلای هەندێك خێزان و بنەماڵەی ئەو شارە پەسەند نەبوو بەڵكو بەكەمیش سەیردەكرا ، بەڵام ئەو هونەرمەندە بەڕێزانە توانیان بەهەموو شێوەیەك خزمەتی ڕاستەقینەی هونەری كوردی بكەن و بناغەیەك بۆ میوزیك و گۆرانی كوردی دابڕێژن.
دوای ئەوەی هونەرمەند عومەر ڕەزا بەتیپی موزیكای مەولەوی ئاشنا دەبێت ، و دەكەوێتە كاركردن لەگەڵیاندا ، ئەو تێكەڵاوبوونە دەبێتە هۆی تۆماركردنی چەند گۆرانیەك وەك گۆرانی.
( لەیارەوە ) لە هۆنراوەی شاعیری گەورە ( ئەحمەد هەردی ) یە هونەرمەند قادردیلان ئاوازی بۆ دادەنێت پاشان گۆرانی ( دیاری ) كە هونەرمەند ( نەجاتی عەبدە) بۆی ئامادەكردووە ، هەروەها مامۆستای گەورە ( ولیەم یوحەننا ) گۆرانی ( گوڵاڵەی ژیان) ی بۆئامادە دەكات ، بەو گۆرانیانە عومەر ڕەزا زیاتر ناوبانگی دەركردو ناسرا.
یەكێك لەكارە گرینگەكانی تیپی موزیكای مەولەوی كەبەرامبەر هونەرمەند عومەر ڕەزا ئەنجامیان داوە و خودی هونەرمەندیش هەمیشە سوپاسگوزاری ئەو كارە باشەیە ،كە تیپی ناوبراو توانیویانە عومەر ڕەزا وەك فەرمانبەر لە فەرمانگەی دارستانی سلێمانی ( دائرە غابات) وەك چاودێر دایبمەزرێنن.
لەساڵی (١٩٥٩) لەلایەن ئیستگەی كوردی بەغداوە بانگهێشت دەكرێت ، بۆمەبەستی بەشداریكرنی لەئاهەنگی یادی شۆڕشی ١٤ ی تەمموز ، لەهۆڵی ئوتێلی بەغداد ، كە چەندین كەسایەتی نیشتمان پەروەری كورد و عەرەب و ( عبدالكریم قاسم ) ئامادەی ئەو ئاهەنگە بوون.
هونەرمەند عومەر ڕەزا لەهەمان ساڵدا لەئیستگەی كوردی بەغدا بەهاوكاری هونەرمەند (شەماڵ صائیب) چەند گۆرانیەكی تر ئەخوێنێ ، گۆرانی ( بۆتۆیە دڵ بۆ تۆیە و تاكەی تاكەی ) كەلەئاواز و هەڵبەستی شەماڵ صائیب بوون.
سەبارەت بە و گۆرانیانە و هاوڕێیەتی و دۆستایەتی لەگەڵ شەماڵ صائیب ، عومەر ڕەزا بەم شێوەیە دەدوێت :
( هەر لەساڵی ١٩٥٩ دا بوو ڕۆژێك شەماڵ صائیب بانگی كردم و وتی وەرە دوو دیاری چاكم بۆ ئامادەكردوویت ، بەخوێندنی ئەو گۆرانیانە دەبیت بە ( فەرید ئەترەش) ( ئەو كاتە فەرید ئەترەش یەكێك بوو لە هونەرمەندە گەورەكانی عەرەب و كاریگەری لەسەر هونەرمەندانی كورد بەتایبەت شەماڵ صائیب دانابوو ) منیش وتم دەستەكانت ماچ ئەكەم كاكە شەماڵ ، هەربۆیە كاكە شەماڵ بەعودەكەی خۆی لەئیستگە سووكە پرۆڤەیەكی پێكردم ، شەماڵ وتی بڕۆ بەخوا خۆیەتی!!!!!! سبەینێ عەسر وەرە بابەكوێرەكانی لەبەر بكەم و تەسجیلی كەین ، مەبەستی كوێرەكان ، گرووپە میوزیکژەنەكانی ڕادیۆی كوردی بەغدابوو)ئەوەبوو لەكاتی دیاریكراودا كە هونەرمەند شەماڵ صائیب داینابوو ئەو دوو گۆرانیە تۆماركراو و بڵاوكرایەوە ، دەنگی دایەو و سەركەوتنێكی گەورەبوو بۆمن ).
دوای ماوەیەك هەردوو گۆرانی ( ئەرێ لەیلێ و بۆتۆیە دڵ) هونەرمەند شەماڵ صائیب بەدەنگی خۆی تۆماری كردونەتەوە.
لەساڵی (١٩٦١) مامۆستای هونەرمەند ( لەتیف حەمدی ) چەند ئاوازێكی بەتێكستی باش و سەركەوتوو بۆ عومەر ڕەزا ئامادە دەكات وەك گۆرانی ( یاری چاوكاڵ و گۆرانی ئەڵێم وەك ساماڵ ) ئەو گۆرانیانەش دەچنە سەر خەرمانی هونەری عومەر ڕەزا و زیاتر ناوبانگ لەنێوەندی هونەریدا پەیدا دەكات.
بڵاوبوونەوەی ئەو بەرهەمانەو زیاتر ئاشنابوونی دەنگی عومەر ڕەزا لەنێو خەڵكیدا بووە هۆی ئەوەی لەلایەن كۆمپانیای (چەقماقچی) داوا لە عومەر ڕەزا بكرێت كە گۆرانی ( هاتم هاتم ) لەسەر قەوان تۆماربكات بەڵام بەشێوازێكی نوێ و كۆرسی كچانی لەگەڵدا دەبێت ،ئەوكارە بۆ ئەو سەردەمە زۆر دەگمەن بووە ، لەبەرابەر تۆماركردنی ئەو گۆرانیە لەسەر قەوان كۆمپانیای چەقماقچی بڕی (٢٠٠) دیناری ئەو سەردەمەی وەك دیاری دەدەنێ.
لەناوەڕاستی سەدەی پێشوو هاوشانی كاری هونەری میوزیك و گۆرانی ، كاری هونەری نواندن و شانۆ لەبرەودادەبێت و كۆمەڵێك هونەرمەندی بەتوانا كۆمەڵێك كاری باشیان ئەنجام داوە ، لەنێوان ساڵەكانی ( ١٩٦٠ بۆ ١٩٦١) شانۆگەری و ئاهەنگی گۆرانی و میوزیك بەیەكەوە پێشكەشكراون ، عومەر ڕەزا وەك هونەرمەندێكی گۆرانیبێژ لەگەڵ تیپی موزیكای مەولەوی لەچەندین ئاهەنگدا لە شانۆگەری ( بەرەو دوا ) ، (مەم و زین ) و ( پیسكەی تەڕپیر) بەشداری كردووە ، لەو شانۆگەریانەدا هونەرمەندی شانۆكارو دەنگخۆش مامۆستا ( ڕەفیق چالاك ) ڕۆڵی گرینگ و بەرچاوی هەبووە ،لەگەڵ چەندین هونەرمەندی تری شاری سلێمانی لەبواری شانۆدا.
هونەرمەند عومەر ڕەزا بەیەكێك لەگۆرانیبێژانی ئیستگەی كوردی بەغداد دێتە ئەژماركردن ، عومەر ڕەزا كەسایەتیەكی بێدەنگ و هونەرمەندێكی هەست ناسك و خۆشەویستی نێو هاوەڵەكانی دەبێت ، پەیوەندیەكی پتەو و خۆشی لەگەڵ هونەرمەندانی ئیستگەی كوردی بەغداد دا دەبێت ، وەك ( مامۆستا عەلی مەردان ، تایەر تۆفیق ، باكوری ، ڕەسوڵ گەردی ، شەماڵ صائیب ، محەمەد عارف جزیری و حەسەن جزیری و جەلال كۆچەر ….تاد).
دوای تۆماركردنی ئەو بەرهەمانە ، بەهۆی دروستكردنی خێزان و بوونی منداڵ و قورس بوونی ئەركەكانی سەرشانی و بەهۆی كەمدەرامەتیەوە ئەو هونەرمەندە لە هونەری گۆرانیبێژی دوور دەكەوێتەوە ، نەبوونی و سەختی ژیان تەنگی پێهەڵدەچنێ.
لەساڵی ( ١٩٨٤) لەسەر داخوازی تەلەفزیۆنی كەركوك هەموو گۆرانیەكانی هونەرمەند بەشێوەی ( پلەی باگ) بۆی تۆماردەكەنەوە.
ئیتر عومەر ڕەزا ڕۆژ بەڕۆژ لە هونەری گۆرانیبێژی دووردەكەوێتەوە ، درێژە بەژیان دەدات تا راپەڕینە مەزنەكەی ساڵی ١٩٩١ وەكو هەرتاكێكی ئەو كۆمەڵگایە خراپی و دژارویەكانی ژیان زیاتر بەرۆكی پێدەگرن و خەم و كەسەری لەدەستدانی هاوسەری ئەوەش بۆ عومەر ڕەزا خەم و داڕووخانێكی تر دەبێت.
عومەر ڕەزا وەک کارمەندى خزمەتگوزا لەدیوانی پارێزگای سلێمانی دەست بەکاردەبێت ، هونەرمەند بەم شێوەیە باس لە پارێزگاری ئەو كاتەی شاری سلێمانی بەڕێز (سالار عەزیز) دەكات كە شێوازی مامەڵكردنی لەگەڵ عومەر ڕەزادا بە چ شێوەیەك بووە:
(هیچ كات دڵسۆزی و هەستی پاك و بێگەردی و مرۆڤدۆستی كاكە سالار عەزیز لەیاد ناكەم ، چونكە ئەو كاتە من فەڕاش بووم زۆر بێ دەرەتان بووم ، ئەو بەڕێزە وەك هاوەڵێكی ساكار و سادەی دێرینی خۆی دەست لەملانم دەبوو ، هەمیشە هەڵگری خەمەكانم بوو، دڵنەوایی دەكردم و قسەی خۆشی بۆ دەكردم بۆئەوەی خەمەكانم بڕەوێتەوە ، بەردەوام هاوكاری ماڵی دەكردم و هیچ كات فەرامۆشی نەدەكردم ، هەموو كات چاكە و پیاوەتی ئەو مرۆڤ دۆستەم لەیادە ، بەهاوكاری كاكە سالار عەزیز یارمەتی بەڕێز مام جەلال بۆ هونەرمەندان بۆم بڕایەوە و هەموو مانگ وەرم دەگرت).
هونەرمەند عومەر ڕەزا خانەشین دەبێت ، و باری تەندروستی ڕۆژ بەڕۆژ ڕوو لە خراپیەو مووچەی ڕێزلێنانیشی بڕاوە لەبەر ئەوەی كە مووچەی خانەنشینی وەردەگرێت ، ئایا ئەو مووچەی خانەشینەی كەوەریدەگرێت تۆبڵێی بەشی ژیانی بكات ، ئێستا ئەو هونەرمەندە لەژیاندایەو بەڵام باری تەندروستی باش نیە و داواكارم لەسەندیكای هونەرمەندان و یەكێتی هونەرمەندان ئاوڕێك لەو هونەرمەندە بدەنەوەكەڕۆژانێك بوو خزمەتێكی گەورەی بەهونەری میوزیك و گۆرانی نەتەوەكەمان كردووە ، ئومێدی لەش ساغی و سەرفرازی بۆ هونەرمەند عومەر ڕەزا و یادی هەموو ئەو هونەرمەندە كۆچكردووانەی گەلەكەمان بەگشتی بەخێرو ڕووحیان شاد بێت.
گۆرانیەكانی هونەرمەند عومەر ڕەزا :
1: هاتم هاتم / لە ئاواز و هەڵبەستی / ( ع ،ع، شەونم )
2: پەڵپ و بیانووم پێ مەگرە / لە ئاواز و هەڵبەستی / ( ع ،ع، شەونم )
3: لەیارەوە ( دیاری ) / ئاوازی / نەجاتی عەبدە …. هۆنراوەی / ئەحمەد هەردی
4: گوڵاڵەی ژیان / ئاوازی / ولیەم یوحەننا
5: یاری چاوكاڵ / ئاوازی / لەتیف حەمدی
6: گۆرانی ئەڵێم وەك ساماڵ / ئاوازی / لەتیف حەمدی
7: بۆتۆیە دڵ بۆتۆیە / لە ئاواز و هەڵبەستی / شەماڵ صائیب
8: تاكەی تاكەی / لە ئاواز و هەڵبەستی / شەماڵ صائیب
بەسوپاسێکى زۆرەوە هەندێک لەزانیارییەکان سەبارەت بە هونەرمەند عومەر ڕەزا ،،،لەهونەرمەندى ژەنیار مامۆستا عەلى حەمە ڕەزا براى هونەرمەند وەرگرتووە