من و دڵ

 

ڕۆژێ من و دڵ بولبوڵی دڵشادی چەمەن بووین

هاوڕازی گوڵی گوڵشەن و نەسرین و سەمەن بووین

ئاسکی لە غەم ئازادی دەر و دەشت و دەمەن بووین

فارغ لە جەفای ڕاوکەر و داو و کەمەن بووین

ئێستا کە بەبێ ڕەونەق و ژاکاوە دڵی من

“لەو ڕۆژەوە ڕۆیشتووە تۆراوە دڵی من”

“هەرچەن دەگەرێم بێ‌سەروشوێن ماوە دڵی من”

کوا جیلوەیی گوڵ، کوانێ سەفا و ڕەونەقی گوڵزار

کوا دیمەنی پڕ نەقش و نیگاری کەش و کۆسار

کوا مەستی و کوا بادە و کوا شادی‌یەکەی پار

کوا نەرگسی شەهلا و دووچاوی ڕەشی دڵدار

کەی شەوق و سەفا و شادی‌یەکەی ماوە دڵی من

“لەو ڕۆژەوە ڕۆیشتووە تۆراوە دڵی من”

“هەرچەن دەگەرێم بێ‌سەروشوێن ماوە دڵی من”

تاوێ لە چنور تاوێ وەنوشە و گوڵی سەر کۆ

تاوێ لە هەڕاڵەی گەش و خوێنینی سەر ئاسۆ

تاوێ لە گوڵی سور و لە گوڵباخ و لە شەوبۆ

گرتوومە سوراغت گوڵەکەم تۆخوا لە کوێی تۆ

نەیماوە ئیتر تاقەت و سووتاوە دڵی من

“لەو ڕۆژەوە ڕۆیشتووە تۆراوە دڵی من”

“هەرچەن دەگەرێم بێ‌سەروشوێن ماوە دڵی من”

 

بەستە : عوسمان ئەحمەدی (پێشوازی لە شێعری مامۆستا بێخود)
ئاهەنگ : حەسەن یوسف زەمانی
گۆرانی بێژ: مەزهەر خالەقی